[蠻野講堂] 台語棲地復育系列座談─對小眾到大眾的石虎保育路

[蠻野講堂] 台語棲地復育系列座談─
                對小眾到大眾的石虎保育路

石虎(Prionailurus bengalensis)佇過去是分布佇臺灣各地海拔1500公尺以下的所在。但是目前干焦賰臺灣西北部佮中部的淺山這跤兜有明確穩定的族群。台灣對石虎的了解包括生態習性、族群現況佮拄著的威脅，攏是佇這成20年才沓沓仔開始的。頭一擺針對石虎的生態研究，是2005至2008年佇臺灣西北部新竹縣和苗栗縣進行的。毋但予咱對石虎的分布、活動範圍、活動模式佮棲地的使用有初步的了解，嘛予咱發現石虎族群當咧拄著的威脅是啥。紲落嘛才開始有各種會致使石虎族群數量減少的威脅佇研究佮保育的過程當中予人弄揚出來。

講起來，是2010年底的苗50楦闊案共關心石虎的研究人員、公部門和民間團體逐家呼倚來，作伙為石虎的保育行動拍拚的。包括路殺、棲地去予人開發等等遮的環境議題嘛予石虎瀕危的命運沓沓仔受到公眾的關注佮支持，閣來形成各種石虎的保育行動的，譬如苗栗縣通霄鎮楓樹里的"石虎米"就是一個例。毋各話閣講倒轉來，當初時石虎的保育那會無得到地方政府佮在地民眾歸心的支持，就是因為牽涉到在地土地開發佮經濟發展，抑有石虎對雞牢的危害等等這寡所謂的"人虎衝突"。所以為著欲呼閣較濟關心石虎的民眾來出力，台灣石虎保育協會(LCAT)就佇2017年10月成立。希望石虎會當透過大眾的關心佮拍拚，通佇"里山"的環境佮人類共存共榮，永續來生存落去。

【講堂資訊】　　　　　　　
講題：從小眾到大眾&石虎保育之路
講師：陳美汀（台灣石虎保育協會 理事長）
時間：2020/6/18（四）19:00-21:00
地點：呷米共食廚房三樓（台北市中正區衡陽路9號）
費用：咱這系列ê課程免收費
主辦單位：台灣蠻野心足生態協會　　　　
協辦單位：李江却台語文教基金會、台文通訊Bong報、台語正常化推動聯盟